السلام عليكم ورحمـة الله وبركاته
اسعد الله صباحكم بكل خير
بداية اسال الله تعالى للجميع في هذا المكان التوفيق والسداد .. واساله سبحانه وتعالى الشفاء لجميع من يعاني من الاخوة والأخوات
وان يجعل الله مااصابهم كفارة وطهورا يارب العالمين .
اخواني اخواتي ..
حقيقة لم اكن اعلم بهذا المنتدى .. وسمعت عنه قبل عدة ايام فقط ..
وقلت لعلي اشارك واطرح مشكلتي وان شاء الله اجد من ينصحني او من مر بنفس التجربة ويساعدني ..
مشكلتي ايها الاحبة
اعاني من مشكلة وصل عمرها الزمني الان حوالي عشر سنوات !!
عشر سنوات وانا اعاني منها .. سلبت مني هذه المشاكل لحظات جميلة كثيرة ..
مشكلتني تتمحور حول الخوف من قيادة السيارة .. وبدأت المشكلة قبل عشر سنوات
بالخوف من القيادة فوق الكباري فقط ..
وتحدث المشكلة من بعد العصر اكثر ..
لكن الصباح تكون شبه معدومه او خفيفه .. ( خصوصا اذا كان في بداية اليوم )
طبعا المشكلة . مع الوقت .. زادت .. وصارت تأثر علي حتى في الانفاق .. وشوي شوي صارت في الخطوط السريعة
يعني اصبحت اتجنب الانفاق + الكباري + الخطوط السريعة
والمشكلة ان المكشلة وصلت حتى الوقوف عند الاشارات لكن الحمد لله اخفت جزئية الاشارات
كنت وصلت لمرحلة اشعر فيها اني ممكن افقد السيطرة وانزل من السيارة واتركها واركض في الشارع !!
فكرة سلبية سيئة جدا تدور في عقلي
اذا كنت على كبري .. فيه حواري سلبي يقول لي اني بفقد السيطرة وبصدم فوق الكبري وبطيح من فوق .. او بصدم باحد فوق وبطيح بسيارتي
في النفق .. احس اني بصدم بجدار النفق
في الخطوط السريعة احس اني بفقد السيطرة اذا جيت اتجاوز سيارة .. اني ممكن الف لا اراديا على السيارة اللي جنبي او واصدم فيها
شعور سيء جدا جدا
صرت اطلع اعذار اني مااروح مشاوير معينة علشان بس مااتعرض لهذي المواقف
حتى طلعتي مع اصحابي اصبحت تتاثر بهذا الشي مع انه للأمانة ماحد يدري بهذا الموضوع ابدا
ماقدرت اكلم حتى اقرب الناس لي
لأني مرة كلمت واحد من اصحابي حسيت انه خاف وبدأ يفكر نفس التفكير فما حبيت ازرع الفكرة في راس احد ويتضرر مثلي
رحت لدكاتره نفسسيين كثير
ابدا في علاج واوقفه بعد فترة بسبب ازعاج الأدوية النفسيه
قبل اكثر من سنتين رحت لدكتور نفسي وعطاني ساليباكس 20 .. ووصلت ل 3 حبات يوميا
وتحسنت حقيقة .. لكن الفكرة لازالت موجودة .. يعني مااختفت 100%
بعد فترة طويلة .. قطعته .. رجعت نفس الأعراض ..
رجعت للدكتور .. عطاني بروزاك .. حبة في اليوم .. لي عليها الان 3 اسابيع ومافيه اي تحسن بصراحة
حتى في الصباح صرت اخاف من الطرق السريعة
يعني اول ماكنت اخاف الا في الكباري بس اما انفاق وخطوط سريعة لا
الحين حتى الخطوط السريعة مااقدر عليها اتوتر واحس اني بفقد السيطرة وبصدم في احد
واضطر اهرب في كثير من المرات لطرق بديلة ومااواجه الخوف
بدات من اسبوعين ايضا علاج نفسي سلوكي .. طبعا ترديد عبارات وتنفس وكذا
لكن بصراحة مااحس انها فادتني الى الان .. يعني اسبوعين مافيه تحسن ملحوظ
طبعا لاحظو ان المشكلة هذي توسعت ايضا للأماكن المرتفعه
يعني مثلا .. الان مااتخيل نفسي اروح اسكن في فندق او مبنى عالي .. احس اني بفقد السيطرة
وبصدم بقوة في القزاز وبينكسر وبطيح من فوق
مع اني قبل 10 سنوات سافرت وسكنت في مبنى في الدور 25 وكان فيه شرفه / بلكونه واجلس فيها ماعندي مشكلة بالساعات بشكل يومي
بس الان لا ..
لو اكون في سوق مثلا اربعة او خمسة ادوار . اخاف امشي في الأدوار العليا احس اني برمي بنفسي من فوق
فكرة سلبية جدا
ماكنت كذا ابدا
فكرت حتى اشوف احد مدرب قيادة مثلا يطلع معي بالسيارة وادفع له فلوس .. علشان بس يعزز الثقة بداخلي
مستعد ادفع اي مبلغ علشان اتعالج .. لأن الموضوع هذا موترني مرررة
طبعا لاحظوا .. اركب الطيارة عادي جدا والحمد لله .. لكن السيارة هي المصيبة وما يتبعها من مخاوف
اللي عنده نصيحة او مر بنفس التجربة وانحلت معه يقول لي الله يجزاه الخير
فعلا .. مافيه مثل الصحة وهي اهم من كنور الدنيا كلها
والله مستعد اتنازل عن اشياء كثيرة مادية .. مقابل اني احصل على الصحة والراحة النفسية وراحة البال
الله يحفظكم واسف على الاطالة