السلام عليكم...
أنا عانيت من كذَا وسواس تقريبًا 4 او شيء..
كان أوّل شيء وسواس الموت بعدين وسواس العقيدة بعدين وسواس النسيان انسى توضيت ولا لا وانسى صليت او لا مع اني متيقنه لكن الفكرة براسي كانت تلح عليّ جدًا، وكمان وسواس الشك سجدت سجدة او سجدتين! كبّرت او ما كبّرت! غسلت رجولي بالوضوء أو لا..
الحمدلله خفّو كثيييير عني مرة الحمدلله يعني تجيني بعض الاحيان بس اقدر اتجاهلها مع تأنيب ضمير خفيف والحمدلله .
لكن اكثر شيء هلكني واحس تعبت مرررررة منه وكرهت نفسي وللحين مستمر معي،،
وسواس الريح.. ما أقدر امسك وضوئي بس اجي اتوضى احس بإنتفاخات ببطني واحس فيها تطلع تعّبتني مرررة ، احس استانس مرة إذا وضوء كمّل لفرض واحد لأن بالعادة ينتقض ..
مو سلس ابدًا الحمدلله بس تجيني بكثرة وتشغلني بوقت الوضوء والصلاة صرت ما أعرف أفرّق بين الحقيقة والوسواس .. صرت هاليومين أطنش حتى لو حسيت فيها لأني اعيد اكثر من مرة ونفس الشيء ومدري هالشيء صح ولالا ؟، وحتى قبل ما كنت كذا. يعني بكثرة الغازات بس لما جاني الوسواس كثرت..
وكمان الوسواس الثاني ذا خلاص كرهت نفسي تعبّني دمرني احس خلاص جلد رجولي تشقق من كثر الموية وصارت تعورني وطلعت لي حساسية ويديني نشفت .. وسواس نزول المني.
اوسوس أيّ افراز لا ذا مني واذا تجاهلت انتي بتصلين من غير طهارة !!!
وويأنبني ضميري وأبكي واروح اغتسل مرات اغتسل 3 مرات باليوم..
صرت أخاف اشوف صورة رجّال او اسمع صوتهم او اي شيء اخاف ينزل مني منيّ..
تعبت من حالتي هذي مرة
حتى اروح اقرأ بقوقل حكم اللي يصلي على جنابة كبيرة من الكبائر ومدري ايش واخاف واضطر اروح اغتسل..وكمان ومهما اغتسلت اوسوس بزمان يعني وما كنت اعرف المني وكنت اتابع مسلسلات وكذا ممكن يكون نزل لي مني !! بس ما كنت اعرفه وقتها والله ولا ادري عنه كنت احسب كل شيء افرازات وصوت خلاص فكرة " إني مو طاهرة براسي مهما اغتسلت" اصلي ولا ادري انا طاهرة ولالا وكمان وسواس الإحتلام تجيني احلام عادية يعني يكون فيها رجل بس مافي شيء مره يعبّر انه احتلام بس اخاف واروح افتش واذا شفت اي شيء اقعد اوسوس ومرات احس وانا نايمة والله مادري وسواس ولا حلم احس برعشة بجسمي واقوم مخروشه وعلطول اروح افتش والاقي افرازات بيضاء شويه ومدري هي مني او لا .. واغتسل
وكمان قريت قبل شوي انو اذا تفاعل الجسم يعني احتلام او شيء زي كذا ما اتذكر بالضبط طيب انا أحلم حلم عادي فيه رجّال بس ما يسوي فيني شيء يعني وكمان احس بالرعشة ذي !! ممكن يكون احتلام لأني وسوست ممكن صارت لي مرتين او ثلاث والحين جتني فكرة إني ما اغتسلت منهم لمّا جتني الرعشة وممكن يكون نزل لي مني وصلاتي خطأ وانا الحين كافرة مع يقيني واتوقع إني اغتسلت لكن الفكرة لحّت براسي لين بكييييييت مرة قبل شوي تعبت قسم بالله
وما كنت قبل اعرف المني والمذي الا لما جاني وسواس وصرت ابحث ومره قريت بالصدفه عنه ومن بعدها جاني..وما اعرف افرق بين الافرازات وبينه مهما قربت الفرق ما اعرف يتلبس علي الامر ولا أعرف
واصلًا هذي الوساوس ما جتني إلا لمّا بديت احافظ على الصلاة قبل تقريبًا 4 او 5 شهور.. قبل كنت زي اي بنت مراهقة اغاني و و وتضييع وقت الصلاة وغيره ولما صحيت على نفسي والتزمت تغيرت حياتي كليًّا بالبداية كنت مستانسة والحمدلله ارتاح وانبسط إذا صليت واتوضى بكل راحة وكنت اصلي السنن الحين حالي انقلب مع الوسواس صرت ااخر الصلاة شوي عن وقتها وتركت السنن لأن يادوب اقدر اصلي الفرض وقت الصلاة بيطلع وانا لسى لأني مع كل فرض لابد اغير ملابسي لاني احس انها وصخانه واجلس مرات بالوضوء 16 دقيقة حتى اهلي طفشوا من وضعي ذا صرت احس كل شيء وصخ اغسل يدي اذا لمست اي شيء واغسل شعري واغسل ملابسي دايمًا يضيع وقت الصلاة وانا لسى أحاول اتجاهل بس ما اقدر يأنبني ضميري انتي بتروحين نار جهنم انتي انتي انتي انتي لين ابكي وحتى مرات افقد شهيتي بالاكل ويصير مالي نفس شيء وما اتحمل أعيد
وكمان وسواس جديد ببدايته يعني احس شيء براسي يقول انتي تصلين لفلان ولفلانه انتي مرائيه !
مدري شسوي تعبت مرة ادعوا لي بالشفاء وافيدوني الله يجزاكم خير..