اريد النصيحه ؟

السلام عليكم ورحمه الله وبركاته
في البدايه اشكر الاخ الخبير النفسي على هذا المنتدى وجزاك الله الف خير وجعله الله في موازين حسناتك
انا فتاه عمري 22 لدي من خمس سنوات تقريبا وسواس او مرض النظافه
في البدايه كان خفيف في السنوات الاخيره زاد ...ما امسك شيء الا بالمناديل الريموت كنترول بالمناديل
اي شي مو لي امسكه بالمناديل
لدرجه كرتون المناديل مايقعد اسبوع في البيت !!
واذا مسكت اي شيء ما اغسل الا بلايف بوي او ديتول واحس انهم ماينظفون !!
ويدي تصير بيضاء من كثر الغسيل
صرت ما احب اقعد في الصاله واذا قعدت احط قماش او مناديل على الكنب
خصوصا اذا كانت ملابسي لسه لابستها
وما احب احد يدخل غرفتي اذا دخلهااحد اتضايق واعصب واروح انظفها كلها
من فتره جبت لي مكنسه كهربائيه لي لحالي وحطيتها في غرفتي
وصرت ما احب اطلع برا البيت كثير واذا طلعت اروح اسبح اذا رجعت البيت
والخ
المشكله الكبرى احس ان سجادتي مو نظيفه مع اني لسه غاسلتها في شي يقول لي انها مو نظيفه ابدا
واذا توضيت للصلاه اعيد الوضوء مره ثانيه اقول فيه غلط
بعض الاحيان ما اعيد الوضوء واصلي
الصلاه نفس الشيء
واذا انتهيت من صلاه الفجر وصلاه المغرب اقول الاذكار بس صرت احس بثقل وكتمه
بس احاول اكملها غصب
واغلب الاحيان وفي اوقات فراغي استغفر الله واسبح واكبر واحمد الله عن طريق مسبحه في جوالي
اذا جيت اقول الله اكبر اسمع كلام يقول الله... نقيض التكبير الي هو التصغير !! استغرب كان الكلام يطلع مني واقول الله اكبر
واحاول اكمل التسبيح !!
لدرجه احس انه صار ثقيل علي
واذا جيت اقرا قصص للانبياء اقول سبحان الله شي يقول لي ان هالقصص كذب ! اتجاهله ونفس الشيء اذا جيت
اتامل في مخلوقات وابداع الله سبحانه
وانا ادعو الله ان يبعد عني هذه الافكار
قبل يومين كنت اصلي الليل واقرا قران في الركعه الثانيه طفي الكهرب علي المدينه كلها وانا كنت اصلي وماسكه القران يوم طفي رحت سجدت وسلمت
وقعدت يمكن عشر دقايق وفتح الكهرب رحت كملت صلاتي الي ان اذن الفجر بعدها بفتره جاني شيء يقول لي
ان الله مايحبني !!
وانه مايبي يسمع صوتي بالقران
عشان كيذا طفي الكهرب
وان الله ما يعرف عني
بعدين قعدت افكر وابكي واقول الله مايحبني !
......
اخي الخبير النفسي انا قريت عن برنامج علاج وسواس النظافه حاولت اني اطبقه بس والله ما اقدر تجيني حاله قلق
وما اصبر ابدا مع اني انا ما اخاف من فكره المرض او من فكره الموت لان الموت حق بس مدري ليه غصب عني
نفسي اصير مثل الناس العاديه بعدين اقول الحمدلله انا ما اذئ احد ..
بالنسبه لبرنامج علاج وسواس الصلاه حاولت اني اطبقه في البدايه حسيت براحه بس بعدين جاني هالكلام ان الله مايحبني

ارجوك اريد النصيحه دورت في النت عن علاج الوسواس لقيت دواء اسمه بروزاك يباع في الصيدليه هل اشتريه ؟
انا اقدر استحمل وسواس النظافه مع انه يسبب لي تعب جهدي ونفسي بس وسواس الصلاه او العقيده ماا اقدر
استحمله
اختكم في الله

" احرص على ما ينفعك واستعن بالله ولا تعجز "