السلام عليكم ورحمة الله وبركاته...
هو ليه الموسوس أسئلته كتير.. وليه لما بيعرف حل مش بينفذه وليه طول الوقت خايف مع إنه مريض وحتى لو غلط عارف إنه ليس على المريض حرج... على فكرة المشكلة دي إيمانية بحتة... يعني لما كنت أوسوس وأفتكر لما أسأل حد من اصحابي المتدينين هيقوللي اقري فقه الاقيه بيقولي اقري عقيدة وتوحيد...
مشكلتنا كلها بتتركز في المحور ده على فكرة... يعني لو الواحد عنده إيمان برفع الحرج من الدين... ورفع الحرج عن المريض ورحمة ربنا أوسع من أن نكون مكلفين بما يصعب الامور لهذا الحد... وأنا مش بأقصد بكلامي إننا منعرفش الكلام ده؟ بس محتاج تثبيت... يعني لازم يبقى راسخ ولازم طول الوقت حاجة بتفكرنا ( إيمان ) بكل ما تحمله هذه الكلمة من معنى... لكن الضعف الفظيع هو أصلا نابع من ضعف الإيمان وعدم تغذيته... يعني كان بيتقاللي هي كوباية فاضية ماحطتش فيها حاجة مفيدة هتتملي حاجات متربة وإذا حتى مليتها بحاجة نضيفة وسبتها بمرور الأيام هتبقى عليها قذر... إذا ما فضلتش تصب مية نضيفة عشان دايما تخرج القذر أولا بأول... لأنه الشيطان كدة كدة هيوسوس... بس هو خلاص بقى لقى الدنيا فاضية ومفيش حاجة تطرده...
آية جميلة أووووي... وبجد لو عشنا معناها وتوكلنا على الله أعتقد فيها شفاءنا كلنا...
( وقل جاء الحق وزهق الباطل إن الباطل كان زهوقا ) أنا سمعت بالصدفة شيخ بيقول إن الباطل لما بيجي على الحق بيدفعه... بس مش هيندفع الباطل من غير ما تجيب حاجة تدفعه... يعني هو بيزهق لما تستخدم معاه الحق فقط... لكن إنه يزهق لوحده.. مش هيحصل...
يعني طول ما احنا حاسين إن اللي إحنا فيه باطل وإن الحق هو ما أنزل الله وجاء به نبي الله عليه الصلاة والسلام وإن التنطع الفظيع ده مش من السنة وده اللي بيعززه في الأصل كثرة القراءة في العقيدة والتوحيد... يبقى ثق يقينا يقينا يقينا... وهذا اليقين نابع من الآية.. إن الباطل ده هيروح هيروح هيروح... مش فيها كلام...
بجد حاجات هتخلينا نرتاح.. نقرأ عقيدة.. ونقرأ قرآن كتير لو نقدر نختم اسبوعيا وأنا قعدت أقرأ بنية إني استشعر التوحيد في آيات الله في الصلاة في كل حاجة.. ابقى حاسة أنه لا إله إلا الله ... والموضوع ده تحسوه أكتر لما تقروا شوية في العقيدة... هنرتاح إن شاء الله... أنا واثقة في الله... لأنه بتجربتكم في حاجات ساعات بتعدي وساعات لا... هو ده نور من عند الله يقذفه الله في قلوبنا... يعني ساعات يمر حكم فقهي إن الاصل في الاشياء الطهارة وتلاقي نفسك بتقول لازم برضو أتأكد افرض أنا غلطان... وأحيانا هو هو نفس الحكم في موقف مشابه تلاقي نفسك بتنطش... هو نور من عند الله... ومفيش حل غير إنه يقوى... بجد أنا لما بألاقي نفسي باتجاهل ومش بيحصل حاجة بأقول أنا اكيد لوخفيت هأضحك على نفسي كتير أوووي... مستنية رأيكم وخواطركم عن الوسواس وتفتكروا إيه الرسالة اللي وصلتلك من هذا المرض؟
كل سنة وإنتوا طيبين :)