- غيداء كتب:
- السلام عليكم ورحمة الله
قررت العلاج ومصره وعازمه بأذن الله والله يصبرني ويعينني فحبيت اني اسال بعض الاسئله عشان مااشك واسئل كل شوي
اولاً لما اصلي مرات تكون في أخطاء فتلقائي تنقطع النيه هل اكمل؟ يعني مثلاً احس الركوع غلط وايضاً الركوع الاول مختلف عن الثاني وكذا او قلت الفاتحه ونسيت اكمل بعدين عدلته اقول فنفسي غلط تعدلين مرات اصابعي مااحسه تلمس الارض واشياء زي كذا
ثانياً: عندي مسأله مهمه سبق وسألت وقلتوا لي يجوز اللي هو قطرات البول هل ينفع تجاهلها حتى لو كان خرج عمداً مني لاني لاحظت انه بسبب الضغط والشد مقدر امسك ولازم اقضي حاجتي الله يكرمكم حتى وان كانت نقطه لذي الدرجه وصلت حتى انها مرات ماتمر ساعه الا داخله وشفت ان ذا الوضع في مشقه شديده بالنسبه لي
ثالثاً : قلتوا اتجاهل المذي مهما حصل وانه اصلاً مايخرج بسهوله طيب لو قمت من النوع وشكيت بالمني كيف اعرف وهل الافضل ماافتش حتى لو غلب على ظني
رابعاً: قضاء الحاجه مرهق بالنسبه لي لان الاصوات متكرره والريح وايضاً الله يكرمكم اعاني معاناه من الامساك فمااحس ينتهي وفعلاً تحصل فهل اتوقف ولا اشاور نفسي مهما خرجت وحسيت باقي ماانتهيت لاني مرات احتاج اضغط اكثر عشان خلاص انتهي كذا يعني
خامساً: مستحيل اغير ملابسي مهما صار حتى لو بول او افرازات طيب الافرازات طاهره ولكن ماتأتي قبل الدوره او بعدها لا اللي هي الصفره والكدره فكيف اتعامل معها ذي هل اكتفي بالوضوء ولا لازم اغير الملابس
سادساً: مرات الافكار تجي عاديه مب افكار وسواس فاقعد اناقش نفسي هل ذا الشي اصلاً مثلاً استهزاء بالدين او لا عشان اضحك او اسكت ومرات اسمع لها واسكت نفسي بسرعه ومرات ماارتاح لازم اناقش خاصه كثير من حولي يتكلمون بالدين واشك انه استهزاء
سابعاً : النيه لا زالت موجوده كيف اشيل فكرة اني لازم انوي لاني فعلاً وصلت مرحلة اعرف انها الفجر وانويها العصر والمشكله عارفه انه الفجر صدق الوسواس يضحك غباء
ثامناً والاهم : تجيني افكار سابقاً ولا زالت للاسف لكن تجاهلتها بشكل قوي وصارت تجي بشكل خفيف لما توقفت عنها مضحكه وغريبه وبنفس الوقت مرعبه مرات احس اني افضل من اختي بالدين فيجني شعور الاغترار بس دايم اجاهد نفسي واقول لنفسي يكفي مجاهدتك واصلاً ذا فضل من ربي ومحد ضامن نفسه والشي اللي يغث اكثر لما اسمع لصوت قارئ بكثره احس اني معجبه فيه ومره شخص من الاقارب في شي مشترك بيننا ومتزوج والله مالي اي علاقه فيه ولا يهمني لكن كنت احتاج بعض الاشياء فكان يساعدني بالرد عليها عن طريق قريبتي هو تخصص له علاقه بالدين فجت ببالي افكار الله ياخذها والمشكله مرا تكررت لدرجة مرات احس كانها عادي عندي وكانه مو مشكله بخيالي كذا والله لما استوعب وتجيني لحظة ادارك واقول استوعبي انصدم واخاف انه اصلاً ليش جاء ببالي وش هالغباء وبس والله مابي الوم نفسي على شي مالي دخل فيه
وعليكم السلام ورحمة الله وبركاته
١- اكملي مهما يصير، ولو شعرتي ان نيتك تحولت او انقطعت، فما عليك، اكملي
٢- قطرات البول يعفى عنها تجاهليها
٣- لا تفتشي، الاصل عدم خروجه، وما يخرج الا من جماع او العادة المحرمة، فيديوهات لقطات نحوه فلا
٤- حتى لو حسيتي انك ما انتهيتي، امضي سبيلك، استنجي وروحي واتركي الريح ولو خرج يقينا، لا يضرك ابدا ابدا
٥- الكدرة والصفرة طاهرة ولكن تنقض الوضوء، فلا يلزمك تغيير ملابسك منها او غسلها
٦- لا تناقشي الوسواس ابدا ولا تقنعي نفسك انها خطا او مو صادرة منك، اعتبريها غير موجودة وطنشيها ولا تبالي
٧- ما يحتاج تنوي، تسقط عنك، اشرعي في العبادة والحمد لله، لا تفكري فيها ولا تتلفظي ولا تستحضري ولا تتذكري ولا تجددي ولا تفعلي شيء الا انك تبدئي في العبادة مباشرة
ما يحتاج تعلمي نفسك ايش نويتي، سبحانه وتعالى يعلم نيتك اللي ما تعلميها حتى
٨- تجنبي قريبك المتزوج قدر استطاعتك، لا تتواصلي معه الا لامر فااائق الاهمية، ولو تواصلتي فعن طريق وسيط، عشان لا نسمح للوساوس تدخل عليك وتشوش، وانت تعلمي ان لا ذنب لك، فاطمئني من هذا، واعرضي عنها ولا تلتفتي واصبري وما صبرك الا بالله، قال تعالى:
(انما يوفى الصابرون اجرهم بغير حساب)
انت الان الاهم من هذا كله ومن الاسئلة، انك تطبقي فعليا، اتركي السؤال، انتهى امرها، الواجب عليك التطبيق بقوة ومن دون تردد
فتح الله لك ويسر