مشكلتي مع الوسواس وكيف بفضل الله تخلصت منها

السلام عليكم ورحمة الله اخواني واخواتي
ببدا في مشكلتي على طول مالي بالمقدمات ..
اولا انا انسانة قبل تقريباً اسبوعين مريت في حالة لايعلم بصعوبتها وخوفها الا رب العالمين فجأة في غمضة عين تحولت جذرياً لانسانة ثانية والحالة الي جتني كانت عبارة عن افكار متتابعة ومخيفة ماتشبه تفكيري وتخالف كثير من مبادئي وشخصيتي وهويتي بمعنى ان اي شي افكر فيه او بالاحرى عقلي يفكر فيه مهما كانت بشاعته يتقبله عقلي واول شي مريت فيه من سلسلة هالوساوس هو وسواس العقيدة مو العبادة يعني شي اعظم وماتقوى النفس تحمله عشت امرّ لحظات حياتي كنت مرتعبة وحزينة وطول الوقت افكر اما في الوساوس او في هل انا رح اتجاوز هالحالة ! وطبعا عقلي هنا يبدا يخوفني زيادة ويخسسني بفقد الامل وانه مستحيل تطلعين منها ورح تعيشين معها للابد ورح توصل بك للجنون وافكار كثير كنت احس اني مخنوقة فقدت متعتي بكل شي كنت احبه كنت شخص ايجابي يحب الحياة متفاءلة تحولت لانسانة على النقيض تماما وجهي كل من شافه لاحظ عليه الهم هالات سوداء وجه شاحب بديت من اول دقيقة جاني فيها هالشعور احاول احرر نفسي منه مااكون حبيسة له مااعيش حياتي اللي وهبها لي ربي في خوف وقلق اول شي رجعت مشكلتي لاصلها وش الاسباب اللي ادت لاني اوصل لهذي المرحلة لقيت ان الفراغ بنسبة كبيرة السبب لاني عاطلة ووحيدة اهلي من البنات وانا بطبيعتي انعزالية فاول شي سويته صرت احلس مع اهلي اروح لاي جمعة لاحظت اني انسى وقتها المشكلة صح ترجع لي اوقات وحدتي بس اهون من كوني طول الوقت حبيسة هالحالة الشي الثاني مو تقليل منه خليته الثاني بس اجيب لكم بالتفصيل حالتي المهم اني رجعت لربي قويت علاقتي فيه حافظت على صلواتي ادعيه انه يفرج عني ويقضي حاجتي ادعيه وكأن كل خلية في جسمي تدعيه معي زي ماقال مصطفى محمود اتكلم معه افضفض له وكلي امل بانه بيفرج علي اهم تقطة في الدعاء انه يكون من قلبك وبالحاح وخضوع وبكاء وانك تحسنين الظن وتثقين بان رب العالمين الرحمن الرحيم مارح يتركك ضايعة خايفة تايهه كذا دامك تطلبين منه العون ، الحمدلله انا الان بعد اسبوعين اقدر اقول اني تخلصت من الوساوس بنسبة كبيرة انتظر اني اتخلص منها تماماوارجع استمتع بالحياة زي ماكنت طبعا من الاشياء اللي ساعدتني النصائح اللي كتبها الخبير كنت اطبقها والحمدلله ،، كتبت هالرسالة عشان الاشخاص اللي يمرون بحالتي او غيرها ويتملكهم اليأس ويحسون انه مستحيل يتشافون انا والله العلي العظيم اني كنت مثلكم بس لاني حرصت اني ماابقى فيها ناضلت كافحت قويت نفسي لجأت لربي ولقيت الفرج من عنده اصبروا ولاتيأسون واعملوا جاهدين انكم تخلصون نفسكم تذكروا ان اليأس ممكن يهدم كل شي بنيته عشان كذا لاتخلي له مجال يدخل نفسك وتعلم من تجارب غيرك اللي مروا بحالتك واسوء بعد .. الان بعد ماعرضت حالتي بعرض مشكلتي لاهل الخبرة واللي مروا بحالتي وطلعوا منها . انا من بعد هالحالة كرهت بيتنا وتفاصيله احس انه يذكرني باللي مريت فيه هل هي حالة طبيعية رغم اني تجاوزت الموضوع مو تماما لكن الحمدلله بنسبة كبيرة ؟! واسال الله لي ولكم الشفاء والراحة والسكينة والطمأنينة الدائمة .

الحمد لله على شفائك الله يثبتك ويسعدك ويهنيك 
لكن لا تنسي أختي ركن المواجهة 
نعم واجهي مخاوفك الآن كخوفك وكره بيتك الذي يذكرك بمرورك بالوسواس فيه لا ولا انت طردت الوسواس من عقلك ومن حياتك كلها والبيت بيتك ادخليه متى شيت وتجاهلي أمر الوسواس كليا  لا تفكري في شيء ولا تربطيه بأي شيء واصمدي وابتسمي وسيزول بسرعة
والله يوفقك لكل خير

وياك يارب والقارئين .. فعلا هذا اللي جالسة اسويه حاليا صح اني احس بضيقة بس ان شاء الله كلي امل انها سحابة صيف فترة وتعدي وترجع لحياتي حيويتها واستقرارها شكرا لك على الرد 🙏🏼❤

الحمدلله بشرك الله بالخير اسأل الله لك دوام الصحه والعافية 

لاتنسي قراءة هذا الرابط

وسائل الثبات على الشفاء

 http://www.alkhabeer2.com/t32-topic



بالنسبه لتضايقك من المنزل فالحل هو تطبيق ركن المواجهة فأنتي طبقتي التجاهل ولكن بقيت لك المواجهة في بعض الامور وهي العودة لكل ماتركتيه بسبب الوسواس مع التجاهل التام

ما شاء الله عليك أختي
الله يعافيك العافية وكل العافية
ولازم الثبات بهذه الفترة والأخ ابو مشخص أعطاك الرابط فاهتمي واحذري من الفخاخ والحيل الصغيرة التي تهمليها .

الله يسعدكم ويبعد عنكم كل شر واشكركم على الاهتمام 🙏🏼